政壇：中學時勝病魔 張仁良感觸多
和富領袖網絡日前舉辦周年大會暨大專院校總會就職典禮，香港教育學院校長張仁良都有出席，並且分享個人經歷，原來佢當年升讀中七時，不幸患上肺結核，嚴重到返唔到學，影響學習進度，係佢讀書年代遇到嘅最大挫折。
張仁良（斜紋呔者）與一班學生分享人生經歷。
李美辰（右）透露爸爸李宗德在家管教嚴格。
七十年代患上肺結核都好麻煩，要食足半年藥兼打針治療，加上該病傳染性高，張仁良惟有匿埋喺屋企自修。不過，皇天不負有心人，佢臥病下仲堅持苦讀，終於喺打最後一支針當日，收到中文大學取錄佢嘅消息。後來佢更乘勝追擊，考埋獎學金去法國留學，更娶咗個法國靚老婆返香港添！佢坦言，成功冇秘笈，一定要正面同多聽取別人意見，盡早規劃人生。
和富社會企業會長李宗德女兒李美辰就透露，自細家中管教好嚴，母親不時提醒佢哋讀書唔只係求分數，仲要學習操行、禮貌等。李宗德仲自爆以前都有體罰，但堅持只限於「打手板」，用自己隻手打愛女手掌，目的係要自己都同樣感受到痛楚，希望小朋友明白有錯就要罰，當然呢個年代唔會再有體罰啦。
