政壇：克勤生日收辣跑 即「劏車」
立法會議員陳克勤收到份好特別嘅生日禮物，就係佢人生第一架「法拉利跑車」，不過，呢架跑車佢收咗十五分鐘左右就劏咗，只留下一個美好嘅回憶。
陳克勤將法拉利食咗落肚。（互聯網圖片）
其實，呢架跑車係克勤嘅同事及助理送贈嘅紅色法拉利跑車造型立體生日蛋糕，壽星仔話，啲同事可能知道佢係愛車之人，趁佢生日時，就好有心思咁送咗呢個蛋糕畀佢，見到架特別跑車時，克勤除咗大讚同事有心思之外，都好好欣賞吓座駕，仲忍唔住話架紅色「法拉利」像真度極高，好似着埋燈咁，真係型到爆。
據講，呢個「法拉利」蛋糕係師傅花咗五小時製作，但當克勤食完架「法拉利」之後，成條脷都變得紅噹噹，夠晒好意頭！
