政壇：葉劉 陳智思「耍冧」撲火

葉劉：對自己家傭如家人

早前有樂隊喺嶺大校園唱粗口辱警歌，身為嶺南大學校董會前主席嘅陳智思尋日回應事件時，突然話自己身為嶺南人，要代表嶺大向公眾致歉。佢解釋，當日嘅表演者唔係嶺大學生，但歌曲內容用詞不恰當，可能冒犯部分人，佢認為，學生有空間邀請任何表演者與學生分享，但應尊重唔同意見人士。

做過嶺南人就搶住道歉，呢個前主席真係承擔十足哦。不過，事件係咪都反映另一個問題，譬如嶺大依家嘅管理層唔夠敏銳，甚至漠視粗口歌事件對校譽、學校學生形象嘅損害呢？

另一個同樣道歉嘅係葉劉，佢之前多次解釋喺社交網站有關外傭言論嘅圖文，無心標籤菲傭，但一眾外傭團體仍未收貨，前日仲嬲到去佢新民黨總部抗議，要求佢公開道歉，連菲律賓駐港領事都發聲明，關注佢嘅不當用詞。火頭愈燒愈烈，葉劉尋日就發公開聲明道歉，佢話，自己同菲傭友好，尊重佢哋勤奮工作同對香港嘅貢獻，仲對自己嘅家傭好似家人咁，希望同外傭團體會面，親自表達歉意。外傭團體總算下咗啖氣，同樣發聲明歡迎佢嘅道歉。