侵權當食生菜 淫媒死性不改
有人話，無賴係流氓嘅一種，但同傳統定義嘅流氓又有所分別，流氓有時仲識得要顧面子，而無賴就完全不要臉。冇錯嘞，好似壹淫媒咁吖，一而再、再而三侵犯東方報業集團知識產權，咪就係完全不要臉嘅無賴囉。
話說舊年十一月二十三日，壹蘋果網絡有限公司旗下網站《壹週Plus》刊登一張女模Rosemary嘅相片，而同一張相片兩日前啱啱喺東方報業旗下嘅《好報》、《好報電子報》以及東網刊登過，版權明顯屬於東方報業，即係話壹淫媒再次侵權。東方為討回公道，舊年十二月入稟區域法院，控告《壹週Plus》所屬嘅壹蘋果網絡有限公司侵犯版權，要求頒發強制令禁制被告作出侵權行為，交出有關相片，並作出賠償，以及按《版權條例》作出額外損害賠償。結果被告跪低求和，向法庭繳存二萬零一元作為「附帶條款付款」，並支付二萬二千五百元律師費，正式係偷雞唔到蝕把米。
話時話，「東方做，蘋果盜」，今次只不過係冰山一角咋。過去十九年，壹淫媒因為侵權而多次向東方賠償或向法庭繳款，金額累計已經超過一百三十萬元，簡直係一項世界紀錄。早喺上世紀，壹淫媒已經頻頻侵犯東方版權，最經典係九六年嗰單畸士，《蘋果日報》盜用東方擁有嘅王菲懷孕搭飛機獨家照片，東方告上法庭贏咗官司，點知反而被法庭罰番轉頭，要替爛果報支付巨額堂費。東方最後上訴到終審法院至得直，爛果報被裁定賠償三萬三千零一元及支付大部分訟費。
仲有吖，爛果報網絡版「蘋果動新聞」被揭發○八年九月至○九年二月期間，至少三十三次抄襲東方旗艦網站on.cc嘅新聞報道，部分更加係百分之一百原文照抄，東方入稟高院要求頒發聲明同禁制令，爛果報除咗向法庭繳款一百萬元和解，仲被海關票控三十三項侵犯版權罪，爛果報承認其中八項控罪，合共罰款四萬元。
所以話，善有善報，惡有惡報，壹淫媒侵權當食生菜，加上反中亂港，早已臭名遠揚，信用破產，銷量有乜法子唔一跌再跌吖。最好笑嘅係，有淫賤黎之稱嘅壹淫媒老闆黎智英，因為搞亂香港而淪為過街老鼠，被迫辭去壹淫媒主席職位，簡直係唔衰攞嚟衰。其實，淫賤黎辭唔辭職都冇所謂咯，壹淫媒專門執人口水尾，睇嚟都唔捱得幾耐嘅喇！
