政壇：搞搞政：白鴿黨無間道 幫工聯會練兵
銳意擴大政治版圖嘅工聯會，計劃派出至少四十人參選年底區議會選舉，又以「票債票償」為口號狙擊「拉布」泛民主派議員。為培訓政治人才，工聯會舊年成立「工聯學院」，仲搵咗白鴿黨成員、港大社會工作及社會行政學系副教授羅致光執教鞭。莫非工聯會唔驚羅致光係「無間道」？抑或羅致光真係吃裏扒外呢？
工聯會理事長吳秋北透露，工聯學院由會長林淑儀任院長，自家培訓政治精兵，開班導師除咗榮譽會長陳婉嫻、全國港澳研究會副會長劉兆佳等，仲有羅致光負責教社福制度。林淑儀話唔介意對方嘅政治立場，該會副會長、建造業總工會理事長周聯僑都係學院學生！
雖然羅致光因其溫和政治立場，早已淡出白鴿黨核心，但公然幫「對家」培訓又真係講唔過去。不過，我哋問過黨主席劉慧卿，佢先係話好耐冇見過羅致光，又話普通黨員做嘢使乜向佢哋交代？似乎唔介意黨友過對家秘撈喎。白鴿黨正值存亡之秋，羅致光唔幫黨友培訓都算，仲幫對家一把，唔通佢都睇死白鴿黨冇得救？我哋打過電話畀佢，可惜搵佢唔到。
盛傳工聯會全力進攻九龍西，周聯僑新上任副會長就乘機鬧爆部分泛民就預算案「拉布」，延誤基建工程撥款。佢揚言會動員落地盤，號召逾三十六萬工友、業界登記做選民，用選票踢走「拉布」議員，「你拉布，我哋就拉票！」坊間有傳民協立法會議員馮檢基重返九龍西參選，以重奪失去嘅議席。唔知係咪選情受威脅，佢尋日急急發聲明，批評工聯會嘅宣傳單張誣衊佢有份「拉布」，奉勸工聯會班後起之秀唔好玩弄政治手段，抹黑其他黨派喎。
