政壇：田二少熟面口得分高過葉劉
對一般市民來講，要記住立法會七十名議員嘅面孔並唔容易，所以佢哋嘅言行最直接影響市民觀感。香港大學民意研究計劃最新嘅調查顯示，市民最熟悉嘅十位議員中，立法會主席曾鈺成得分最高，排名第一；新民黨「田二少」田北辰則重新上榜，而且高踞第二位，黨友行政會議成員葉劉淑儀就尾隨排第三，究竟點解田二少會突然由榜外躍升至第二位，仲要超越葉劉呢？莫非係同佢之前大力推動一簽多行封頂有關？
亞洲移居人士聯盟約數十人尋日到葉劉灣仔嘅辦事處大廈外抗議。（亞洲移居人士聯盟提供）
不過，相信今次調查仍未反映葉劉日前有關菲傭提供性服務言論風波嘅影響。葉劉日前喺個人網站上圖文並茂標示「大量菲傭為外國男士提供性服務？」結果引起外傭權益組織關注。雖然葉劉已在網上留言就事件深表歉意，但亞洲移居人士聯盟數十人尋日仍到葉劉位於灣仔嘅辦事處大廈外抗議，批評佢嘅言論涉及種族及性別歧視，不尊重女性和工人嘅權利，令人憤怒，要求佢向菲律賓移民同來港從事家務助理工作嘅人公開道歉。
