政壇：泛民拉布醜態百出
尋日立法會繼續辯論預算案，包括社民連「長毛」梁國雄在內嘅「拉布三子」總共八次按《議事規則》規定要求點算開會法定人數，有兩次響鐘十四分四十幾秒仍然未有足夠嘅議員返回會議廳，差啲流會。除咗不斷要求點算法定人數外，激進泛民更加搵人嚟鬧，而公文袋嘅陳家洛竟然冇跟泛民大隊，變相幫手拉布。
李卓人難敵睡魔，疑似瞓着咗。
之前都講過，白鴿黨講明唔參與拉布，但就唔支持預算案，而立法會前日首日辯論預算案，包括公文袋在內嘅泛民政黨都唔出聲，被質疑泛民政黨係暗撐「剪布」。但係陳家洛尋日喺辯論期間，竟然冇跟隨大隊同「拉布」劃清界線，反而喺尋日發言五次，足足講咗一個多小時，唔通佢想成為泛民嘅壞孩子，加入「拉布」？
拖長戰線嘥時間
最差嘅係，因為泛民無參與「拉布」，大部分人坐喺議事廳都冇乜嘢做，其中工黨嘅李卓人就難敵睡魔，疑似「釣魚」瞓着咗添！真係醜態百出。
既然溫和泛民唔幫手，咁拉布三子惟有撩交嗌嚟拖長戰線，好似建制派嘅Ann蔣麗芸發言時講到法律援助常被濫用，仲話佔領行動期間，有人叫一個伯伯或婆婆申請法援，向法庭申請撤銷臨時禁制令，此舉係拎法庭嚟玩，做法離譜，點知就被長毛侮辱佢係屎。長毛話《基本法》規定，香港居民有權對行政部門和行為向法院提出訴訟，指法援批出呢類訴訟嘅數量不足三成，批評阿Ann無知得令人大開眼界、嘆為觀止。仲叫阿Ann「你讀吓書得唔得？呢啲乜議員嚟？」
人民力量陳偉業提到東江水係「將屎水畀香港人飲」，阿Ann就立即反駁話「希望大家飲水思源，飲得人哋啲水就要感恩，唔好今日喺度講風涼話」。慢必為咗幫口，亦都對阿Ann開火，用新加坡買水同香港比較，話香港比起新加坡買水貴二百二十六倍，「依家唔止係買貴水，仲係買貴屎水」。
