三個車站齊漏水 港鐵慢工出劣貨

嗱，呢幾日陽光普照，但係香港大學站出口嘅地底行人通道兩處天花板就「落緊雨」，職員要以「水桶陣」應付。西營盤站以及延至上個月至啟用嘅堅尼地城站，情況都好唔得去邊。本報記者聯同專家到堅尼地城站睇過，發現其中一個出口電梯大堂附近，一處被裝修圍板覆蓋嘅牆身同天花出現滲水，地面積水長達三米；有水渠更出現淤塞情況，積水幾乎滿瀉咁滯，搞到乘客怨聲載道。

即管聽吓港鐵點解畫。佢哋話有關車站位處地面數十米以下，有少量地下水滲入屬普遍現象，又死撐對車站結構同車務運作無構成影響；被問到設計車站時有冇考慮過地下水問題，港鐵就話有考慮過，但唔代表能做到絕對防水喎。

咁都得？普通人家裝修新居，一入伙發覺甩漏多多，唔係漏水就係牆身剝落，都嘈到拆天喇，更何況家陣講緊大拿拿百幾二百億元嘅大型基建，仲有冇再化學啲呀！專家就講得啱嘞，對於港鐵嚟講，地下水滲透係常見問題，施工期間一早應該發現，依家至急急補鑊，絕對係罕見嘅低級錯誤。

唉，人哋就話一分錢一分貨，點知本港大型基建啱啱相反，慢工出劣貨，貴嘢一樣冇好嘢，車站漏水只係小兒科咋。最經典例子係耗資八十億元興建嘅啟德郵輪碼頭，好睇唔好用，試過一場黑雨過後，即時變身「水世界」，要出動沙包「排洪」，貽笑國際；造價逾五十億元嘅「門常開」政總仲離譜，曾經被審計署踢爆超過十六萬項紕漏，甚至試過室內播菌令高官感染惡疾入院，被封為「史上最貴豆腐渣」，可謂實至名歸。

諗落都幾悲哀，同樣係大型基建，回歸前精心製造，質素有保證，淨係一條海底隧道，使用超過四十年都冇乜問題；反觀回歸後，基建超支延誤當食生菜，家陣仲搞出一個又一個豆腐渣工程，簡直醜死怪。咪話太一叮唔提醒，家陣正值基建高峰期，最怕當局為趕進度，犧牲質素，特別係高鐵工程，一旦重演當年溫州動車追尾慘劇，呢隻鑊冇人孭得起o架，叮！