城中鏡：孫秉樞讚女人真幸福
近排歐羅跌勢持續，歐洲名牌紛紛減價，連向來從不減價嘅法國名牌，亦率先減價兩成，但注重衣着打扮嘅東華三院歷屆主席會主席孫秉樞話男裝未受惠，大嘆做女人真幸福。
陳文綺慧話名牌袋減價都吸引唔到自己。
孫秉樞（右）同李三元談及歐洲名牌減風，同樣話男裝暫時未受惠。
陳聖澤（右）同陳耀莊齊齊出席晚宴，其中陳聖澤透露鑽石售價輕微下調。
東華歷屆主席會早前搞聯歡晚宴，多位前主席包括陳聖澤、陳耀莊、李三元同Viola陳文綺慧等齊現身。做鐘錶嘅孫秉樞一向鍾情紳士打扮，每次出街，衫褲鞋襪必定襯晒色。對於歐洲名牌最近紛紛減價，孫秉樞慨嘆名牌減風只有女士受惠，男裝連少少折扣都無。
陳文綺慧無意執平貨
正就讀博士學位嘅李三元亦不時去歐洲掃名牌衫，佢日前飛到上海出席一個意大利名牌晚宴，搶先掃春裝，不過雖則歐羅平，計落抵過喺香港買，可惜減風未去到男裝，否則佢出手會更狠喎。
不過，同場嘅Viola話唔會去執平貨，自言好少去追逐名牌，買袋最緊要袋身夠「軟腍腍」，又話係咪名牌貨反而唔重要。
另一方面，本身賣珠寶嘅陳聖澤透露鑽石售價亦輕微下調，事關內地搶購奢侈品風氣收斂，喺供過於求下，鑽石價格回落幾個百分比。佢又提及，雖然內地買家收斂，轉頭輪到香港闊太出手，趁平掃鑽石保吓值。
