政壇：搞搞政：區選不獲推薦黃成智疑被清算

黃成智早喺九十年代初就當選擔任北區區議員，其後斷斷續續有贏有輸，連同當選立法會議員亦試過做「雙料議員」，但佢喺一一年區選同一二年立法會選舉都落敗，一瞬間成為「雙失」議員。

巧合缺席相關會議

據悉佢考慮喺年底區議會選舉捲土重來，再次申請代表白鴿黨出選北區區議會，有意落戶新劃選區粉嶺南，但聽聞該黨新東支部上周五召開會議，先後否決推薦三人代表該黨出選，黃成智係其中一人，而事有巧合，佢疑未卜先知，當日亦缺席有關會議，未有於現場介紹政綱同解答在場人士提問。

對於有傳黃成智未獲推薦代表白鴿黨出選，或同早前政改「袋住先」言論有關，該黨新東支部主席周錦紹接受查詢時承認，有與會者對黃成智有關言論作出提問，但基於黃因事未有出席，亦未有授權他人代為解釋，或提交書面政綱拉票等，所以席間冇人可以替佢解答問題。

黃成智亦坦承有向黨申請希望獲批參選年底區選，事後亦會向黨補交資料。當問及當日點解冇去開會，佢聲言「做乜要同你交代原因」，強調會向黨新東支部解釋喎。

據聞黃成智口中嘅「補交資料」，距今有一段時間，講緊係今年六、七月嘅中委會，屆時要由起碼十名黨友聯署支持佢參選，再經中委審批至得，加上通常由黨支部推薦嘅人，中委會好少會否決，所以佢今次未獲推薦，加上「袋住先」言論被黨內激進派狙擊，如果要翻身力挽狂瀾嘅話，佢認真要度下橋喇！