政壇：鬍鬚曾估錯市 爆速遁
話說恒指上周連日升市，加上電視台重播經典劇集《大時代》嘅「丁蟹效應」，財爺「鬍鬚曾」曾俊華前日發表網誌，估計尋日股市好可能會裂口低開，最終佢估錯市，恒指起初高開百多點，唔知係咪因為老貓燒鬚，佢尋日早上出席活動後，冇再回應股市問題，亦揀咗非正門嘅另一出入口離開現場。其實鬍鬚曾都錯唔晒，恒指高開後掉頭倒跌，收市時跌五百多點。
曾俊華
曾俊華避開會展會場外嘅示威，選擇另一出入口進出會場。
講番鬍鬚曾尋日早上出席貿發局舉辦嘅家庭用品及家用紡織品展開幕禮，社民連議員梁國雄等十多人一早喺會展港灣道會場外，帶同紙製大白象等示威物品抗議，批評機場第三跑道等工程為「大白象」，促請政府盡快設立全民退保，但被在場一批保安阻止佢哋入場，而鬍鬚曾亦選擇另一出入口，即係博覽道嗰邊出入，自然可以輕易避過梁國雄等人嘅狙擊。
