政壇：遇車禍逢地震陳雲生遊日虛驚
趁日圓低水，港人排住隊去日本旅遊，連屯門區議員陳雲生都唔例外，早幾日同家人去沖繩自駕遊，不過旅程之初已發生一段小插曲。陳雲生話前日黃昏時間，太太龍瑞卿負責開車往沖繩北部，途中遇上滂沱大雨，到達酒店時，儀錶板亮起紅燈，顯示行車電力不足，諗住將車泊到停車場再作打算時，點知失控撞凹咗前面車輛車尾。
陳雲生（右二）聯同太太（右一）、媳婦（左一）同孫女等人到沖繩自駕遊一度撞車，幸好大家都冇大礙。（互聯網圖片）
陳雲生話由於唔識日語，正愁緊點樣與前車司機交代時，經酒店協助後得知對方都係港人，即時免除咗溝通障礙，又慶幸大家都冇大礙，估計今次意外會要多花費約一萬日圓。
另外，佢同家人尋日又撞正當地發生黎克特制六點八級地震，佢最初話唔為意，直至其兒子致電問候時，佢先至得知當地有地震喎。
