政壇：港交所股價掛鈎政改
政府聽日會公布二○一七年特首普選方案，無論政府抑或建制派，都接連出招，爭取泛民回心轉意支持，其中立法會金融服務界「肥老闆」張華峰都想政改通過，疑以另一方式希望爭取泛民支持，理據係如果政改獲得通過，政府就可集中精力發展經濟，加上「深港通」預料提早開通，屆時股市一定繼續節節上升，其中港交所目標價上升至四百元並非難事。肥老闆即係將政改同港交所股價掛鈎啫，但呢鋪係咪如肥老闆所願會贏？真係好難預料。
配合「深港通」 愈升愈有
肥老闆近期喺股票市場大有斬獲，佢尋日中午同老友共進午餐，又有龍蝦、鮑魚同東星斑，除咗繼續唱好股市外，連帶政改都講埋一份。
佢話政改通過後，普羅市民唔止有多一票可以揀特首，相信受惠於政改爭拗結束，股市會愈升愈有，尤其係港交所，佢話政改通過後，加埋「深港通」預料提早開通，港交所一路升到去四百元，都唔係難事。
不過，說時遲那時快，撞正恒指高開百多點後掉頭倒跌，肥老闆一發現港交所股價急瀉近十蚊，即刻拎起電話打畀御用經紀落盤，以差唔多二百七十蚊掃咗五萬股港交所。
事隔不足十分鐘，港交所價位再跌多兩蚊至二百六十八蚊，在場人士都戥佢肉赤，點知肥老闆愈跌愈買，打多個電話畀經紀，再掃多五萬股「溝貨」。
據聞有人幫肥老闆埋單計數，單喺短短半小時已用咗二千七百萬元入貨，加上股市全線下跌下，肥老闆喺帳面仍賺咗三十萬元，認真係見慣風浪嘞！
