活化街市十五億 無底深潭知多少

講緊嘅咪就係空置咗十二年嘅中環街市囉，話就話要活化，點知拖到依家仲係無影無蹤，得個噏字。呢，市區重建局承認，原本預留五億元活化，一拖再拖之下，造價已經飆升到十五億元，比預算足足翻咗兩番。當局為咗節省開支，據講可能要刪去最昂貴嘅重點設計，變相攞走成個項目嘅「靈魂」，咁嘅所謂活化，即係搵嚟搞啫。

唔使問阿貴，呢個項目又係前特首曾蔭權爵士留低嘅蘇州屎。佢○九年提出保育中環，包括活化中環街市，講到天花龍鳳，可惜眼高手低，有頭威冇尾陣，活化計劃一波三折，一直開唔到工，而建築成本就不斷飆升，初時五億，依家十五億，遲啲可能二十億，隨時變成無底深潭，活化又死，唔活化又死。

正所謂，見微知著，貪曾好大喜功，禍港殃民，呢個「爛尾工程」只不過係冰山一角咋。試諗吓，佢任內推出嘅所謂「十大基建」，有邊樣唔係一拖再拖吖？有邊樣唔係嚴重超支吖？港珠澳大橋係咁，高鐵工程係咁，西九文化區亦係咁，幾乎無一幸免。早前有人計過數，淨係十大基建咋，超支金額就超過一千億元，問你怕未！

最弊嘅係，社會愈來愈政治化，反對派全面不合作，工程延誤及超支將會陸續有來。好似前排拍板嘅機場第三條跑道咁吖，問題多多，爭議不絕，究竟可唔可以如期動工，睇怕連港府都唔敢寫包單。第三跑道造價達一千四百億元，本來已經係全球最昂貴跑道之一，萬一再有阻滯，拖多幾拖，分分鐘唔夠埋單，最後淪為大白象工程都似，唔怪得有人質疑第三跑道物非所值。老實講吖，使咁多錢起條跑道，係咪符合成本效益，真係好難唔令人懷疑咯。

所以話，香港時運不濟，好似撞邪咁，諸事不順。淨係活化中環街市就要花十五億元，其餘大型基建更加唔使講，一個項目超支閒閒地過百億元，納稅人簡直冤哉枉也。港府話就話儲備充足，肥到連襪都着唔到啫，但遇到一班眼高手低嘅無能官僚，同埋專門倒米嘅無良政客，多多儲備都唔夠，遲早坐吃山崩，齊齊玩完嘅咋，叮！