SUN搞作：網絡小說：向厄瓜多爾學習
南美國家「呃」瓜多爾為咗推廣本土旅遊，竟然演出一場大龍鳳，扮晒帶班民眾出國狂歡，原來只係喺境內大玩特玩，嘩，唔止你同我服，連Greg蘇都拍爛手掌，睇到哈哈大笑。
好可惜，片刻歡愉帶唔走Greg蘇嘅煩惱，尤其係實施咗「一周一行」之後，周末關口竟然塞爆疑似水貨客，邊境購物城又掀起反對聲浪，睇嚟畀人媽媽叉叉嘅日子仍然有排捱。
「有計！」Greg蘇憑住厄瓜多爾賜予一點靈犀，竟然發揮出無窮智慧：「內地水貨客咁鍾意落嚟香港，都係貪我哋個名，心理作用啫！不如我哋喺內地整個假關口，整個假香港，改晒啲路牌，干擾GPS，啲水貨客咪照舊開開心心，一包二包咁買返去，中港矛盾即刻無晒！」兵貴神速，Greg蘇即刻起草建議書，呢次真係揚名立萬好機會喇。
