政壇：搞搞政：葛珮帆搶先機騎劫「聰明城市」
九龍東要打造成「聰明城市」（Smart City）經公布後，政府仲處於研究階段，但立法會議員葛珮帆（EQ）已搶閘成立一個「聰明城市專家小組」，日前仲舉行咗首次圓桌會議兼出埋新聞稿，十足政府委任委員會咁款。EQ咁快手，係要騎劫政府個「聰明城市」計劃，定係搶先做聰明專家，為區議會選舉同立法會選舉造勢呢？
（設計圖片及對白）
新聞稿抄足委任格式
施政報告公布嘅「聰明城市」範圍會涵蓋啟德、九龍灣及觀塘，但具體建議同優次措施要明年底至有。不過，日前，EQ已搶先成立咗一個「聰明城市專家小組」，上周四嘅圓桌會議更邀請埋發展局副局長馬紹祥等官員出席。細看呢個「聰明城市專家小組」嘅組成，雖然話係廣邀工程、科技、城市規劃、智能運輸等唔同範疇嘅專家，但當中其實唔少成員都係來自由EQ成立嘅互聯網專業協會（iProA），而且仲係iProA嘅骨幹成員，話佢小組係iProA嘅翻版都唔算錯，而且，專家小組就由EQ同iProA前會長鄧淑明擔任聯席主席，成員包括iProA現任會長洪為民、副會長鄭松岩及副秘書長楊文銳。
最搞鬼係，小組向傳媒發出嘅新聞稿，連格式都抄足政府過往公布委員會委任名單時嘅新聞稿格式，唔知嘅仲以為政府委任咗佢哋負責九龍東「聰明城市」嘅研究工作添。
