政壇：楊立門為慈善 願做無「糧」歌手
由樂施會舉辦、一年一度嘅「樂施音樂馬拉松」已經踏入第二十五個年頭，尋日開幕禮更邀請「AO（政務官）歌王」民政事務局前常任秘書長楊立門（Raymond）夥拍著名音樂人趙增熹擔任壓軸表演嘉賓，趙增熹鋼琴伴奏，Raymond就獻唱經典金曲《Greatest Love of All》同《獅子山下》，博得全場掌聲。問佢有冇人撬佢過檔幫手？佢笑言政府嘅「過冷河」制度相當嚴謹，退休後首年幾乎咩都唔做得，與其坐喺屋企，佢樂意唔收分文，為慈善做無「糧」歌手。
楊立門（前）落力獻唱，拍檔趙增熹（後）讚佢「職業水準」，表現好過好多歌手喎。
余志穩離開政府後，足足過咗三年「冷河期」，先加入樂施會。
講起「過冷河」，曾任民政事務局副秘書長嘅樂施會總裁余志穩（阿魚）肯定感同身受。佢透露，雖然已經離開政府六年，但加入樂施會前足足過咗三年「冷河期」，避免延後利益嫌疑。
而「過冷河」期間曾經獲港大邀請授課，雖然兩堂講課只係象徵式收五千元車馬費，但佢向政府申請，都要足足半年先獲批准，而港大課程未等得切政府批准已經上完堂喇！
