政壇：周浩鼎轉直選人格分裂
區議會委任制將於十一月區議會選舉後壽終正寢，唔少委任議員都謀求轉換「跑道」，民建聯離島委任區議員周浩鼎（Holden）都係其中之一，佢話東涌既有公屋、居屋人口，仲有唔少外籍人士聚居嘅中產屋苑，地區議題亦因應居民背景而各有取向。唔單止咁，佢落區宣傳更要印齊中、英文傳單，仲要不時雙語廣播，爭取外籍人士支持，睇嚟佢要學識「人格分裂」至掂。
由委任轉打直選，Holden其中一個考慮嘅落腳點包括民建聯黨友周轉香嘅東涌南選區，呢區公民黨過去兩次嘗試插旗都敗北。本身係律師嘅Holden除咗兼備專業形象，亦係新鮮出爐嘅民建聯副主席，相信有助鞏固建制派票源。Holden自言每星期落區四日，閒閒地「打躉」半日，地區工作紮實，唔驚任何傘兵來襲咁話，但就要犧牲陪下月滿一歲嘅囝囝親子時間喇。
