政壇：葉劉論性 招是「菲」
香港好多中產家庭都有聘請外傭，行政會議兼立法會議員葉劉淑儀早前跟進市民投訴涉外傭嘅個案時，撰寫文章提到佢曾經收到投訴話有女傭勾引男戶主，令到人哋家庭破碎，篇文被上載社交網站，仲圖文並茂標示「大量菲傭為外國男士提供性服務？」結果引來外傭權益組織關注，批評佢涉種族歧視，甚至要求菲律賓將葉劉列入「不受歡迎外國人」黑名單，禁止佢入境添。撐咗一輪後，葉劉終喺社交網站貼文「沙冧」，話文章嘅配圖引起公眾對文章內容嘅誤解深表歉意。
（設計圖片及對白）
呢篇題為《跳樓慘案反映另類外傭問題》嘅文章，引起風波後，外傭權益組織狠批，更有泛民主派議員「抽水」，話要去平等機會委員會投訴。葉劉先回覆傳媒查詢時原本話由得人哋投訴，並冇就事件道歉。不過，後來佢就再喺社交網站話，有關文章所用嘅配圖極不恰當，有誤導公眾之嫌，佢得悉後已經立即通知助理刪除相關配圖。
葉劉仲話，文章旨在反映社會實況，絕無帶有半點種族歧視或標籤菲籍傭工為性工作者之意，對於配圖引起公眾對有關文章內容嘅誤解，佢深表歉意，日後喺審閱配圖及內容時定必加倍小心，並會對該部門主管作出適當嘅處理。
麒麟撞後多阻滯
記得葉劉喺農曆大年初二到沙田車公廟出席活動時被麒麟撞飛，當時堪輿學家麥玲玲就話，葉劉被麒麟「技術性擊倒」，意味佢喺羊年會多阻滯同麻煩，要小心說話及口舌是非，仲建議佢要低調行事，勿鋒芒太露，真係畀佢開口中。早前葉劉喺立法會就普通話教中文嘅議題發言時，唔小心將唐朝詩人杜甫嘅「甫」讀成「普」，已經成為笑柄，今次撰文又出事，睇嚟葉劉都係要低調啲、少說話多做事先得喇。
