生活用品樣樣加 你怕我怕個個怕

呢，消委會最新調查發現，三大連鎖超市二百種較受歡迎貨品，舊年平均加價百分之一點八，加幅比前年高出一倍；十三大類別貨品中有九類上升，部分貴咗接近四分之一添。根據統計處數字，舊年綜合消費物價指數升咗百分之四點四，其中食品升咗百分之三點四，當中鮮果升幅更超過一成。正所謂，唔聲唔聲，嚇你一驚。

表面睇，超市貨品加幅都唔算太離譜，但唔好唔記得，漲價貨品多數係市民日常所需，開門七件事，柴米油鹽醬醋茶幾乎無一幸免，基層家庭避無可避，百上加斤。

屋漏偏逢連夜雨，日常用品價格不斷飆升，其他生活開支同樣不斷增加。就以交通費嚟講吖，加價潮已經出現嘅喇，除咗年年賺大錢年年加價嘅港鐵之外，近六十條專線小巴陸續獲批加價，而多條離島渡輪航線同行車隧道亦唔執輸紛紛申請加價，市區的士仲話到明未來四年將會加價兩次添。咁又難怪嘅，港府係港鐵大股東，年賺過百億都加價，其餘交通工具唔有樣學樣至奇喇。所以話，港府根本就係加價潮嘅始作俑者。

即係咁，近年本港通脹數字都唔算好高，就業情況亦比較理想，弊在普通打工仔人工升幅一直跑輸通脹，呢個先至係最大嘅問題。生活指數愈來愈高，人工加幅就愈來愈奀，基層市民好似王小二過年咁，一年不如一年。仲有吖，私人樓價不斷飆升，房租水漲船高，而公屋又供不應求，無殼蝸牛望樓興嘆，度日如年，點可能唔怨氣沖天吖。

港產官僚不知民間疾苦，庫房豬籠入水，但一味做守財奴，一時話要審慎理財，一時話要防止出現結構性財赤，連派糖都派到不情不願，唔湯唔水，真係豈有此理。你話嘞，官富民貧，深層次矛盾有乜法子唔惡化吖。

講到底，人必自侮而後人侮之。財政預算案年年被立法會拉布阻撓，固然因為政客無事生非，搞風搞雨，而港產官僚孤寒成性亦難辭其咎。咪話太一叮唔提醒吖，基層市民面對加價潮無能為力，谷鬼氣上嚟，隨時好似歌仔所唱「發起爛渣」o架，叮！