名模琦琦前晚出席香港著名設計師張路路時裝店嘅珠寶展酒會，琦琦嘅手筋發炎同腰傷都未好，話近日有去睇跌打同做刮痧，佢話：「兩個位置受傷時間唔同，因為之前唔喺香港，所以冇時間睇。醫師話做多兩、三次刮痧就OK，依家喺屋企同老公（任達華）做吓瑜伽咁啦！」

琦琦（右）同張路路老友鬼鬼，就算傷患未愈都去捧場。

琦琦又透露囡囡Ella會幫手同佢按摩腰部，「佢又叫傭人畀暖水袋我敷，我就話『不如你坐喺媽咪嘅腰度，等媽咪舒服啲。』不過佢冇踩背，只係用屁股坐喺我條腰度，佢覺得好玩，又可以參與吓媽咪嘅治療，小朋友係咁啦。」

復活節琦琦帶咗囡囡Ella去上海工作兩日，跟住去探公公，仲食咗六隻酒浸大閘蟹。受傷可以食蟹咩？佢話：「醫師淨係話唔食得糯米，唔怪之得食完嗰兩日仲痛啦，佢冇話蝦蟹唔食得，我仲以為係坐飛機蹺腳嘅關係添！我真係少咗啲生活常識。」

第一手消息請下載on.cc東網iPhone/iPad/Android/Windows Phone Apps