城中鏡：專資會推崇好客土耳其
受到連串反水貨客行動影響，訪港內地旅客急跌，零售業叫苦連天，相對歐洲國家就落力吸客，催谷旅遊業。專業及資深行政人員協會（專資會）一眾會員，趁復活節假期暢遊土耳其，有份跟團嘅專資會理事、新華旅遊董事總經理Cindy楊章桂芝話，當地人待客親切，見到遊客會主動交談、帶路、合照；就連街邊小販，都主動用普通話叫賣，歡樂友善嘅氣氛值得港人好好學習。
楊章桂芝（左）同友人張麗儀喺有「藍廟」之稱嘅名勝藍色清真寺前留影。（受訪者提供）
陳記煊（前）巧遇熱情好客嘅學生，開心合照。
李樂詩（右）同伍翠瑤行到攰，坐低浸天然溫泉紓緩疲勞。（受訪者提供）
嘆香港景點少
土耳其復活團由專資會副會長吳長勝任團長，同行有極地探險家李樂詩、副會長伍翠瑤、財務長陳記煊夫婦等。遊土耳其，唔少得體驗坐熱氣球俯瞰奇石林美景，但自從埃及發生熱氣球意外後，土耳其嘅熱氣球駕駛員都格外小心。飛行當日忽然遇上大風，熱氣球公司下令停飛。幸好當地有天然溫泉、上百萬年嘅風化岩石，仲有挖洞而居嘅獨特風俗，逐一參觀，算係補番數。
團友跟住拉隊參觀博物館，巧遇當地師生主動上前交談，又要求拍照留念，原來老師鼓勵學生多同遊客溝通，練習英語。Cindy話相比之下，港人似乎戾氣較多，慨嘆香港特色旅遊景點乏善足陳，有歷史故事嘅名勝買少見少，若加上仇視遊客嘅態度，香港吸引力真係大打折扣，呼籲港府多增建旅遊景點，亦要向土耳其學習，營造開放友善旅遊氣氛至有出路。
