政壇：搞搞政：開盤或犯賭例高達改圖賴嘢
白鴿黨尋日喺社交網站上載咗一幅叫做「男人的浪漫，晒冷五十萬」嘅《賭神》電影海報改圖，白鴿黨中委會成員「高達」李永達個頭被Key到「賭神」周潤發身上，改圖仲寫明「李永達開盤50萬、賭民主黨不轉軚」添。雖然網上有唔少人讚好，但該黨同高達原來已經喺不知不覺間誤墮法網。
喺社交網站上載《賭神》電影海報改圖，李永達個頭被Key到「賭神」周潤發身上。（互聯網圖片）
問過同屬白鴿黨嘅黃大仙區議員、律師黃國桐，佢話透過網絡聲稱開盤有機會觸犯《賭博條例》，首先要界定係唔係賭博，白鴿黨轉唔轉軚，係你控制唔到嘅，可以開大亦可以開細，預計唔到，所以有博彩成分。佢補充：「如果開盤嘅人只係口講口賠，之後辯稱『係吹水啫，都無涉及金錢交易』或者承認係『講大咗』，咁就唔算犯法。」不過，高達事後似乎未有清楚講明係咪吹水或者講大咗。
點解高達今次咁失策呢？睇番事件嘅始末，原來係社民連陶君行早前喺網上電台聲稱要開一個二十萬元嘅賭盤，賭白鴿黨唔會「轉軚」，但最近見到白鴿黨黃成智嘅政改「袋住先」言論後，佢就打算縮沙。高達見狀就誇下海口，公開開盤豪賭五十萬元，拍心口保證該黨政改立場堅定，絕不會「轉軚」。究竟阿陶係咪真係要開出二十萬元嘅賭盤呢？尋晚截稿前仍未能聯絡到佢。
至於係邊個咁醒目，發現個社交網站嘅貼文有問題呢？原來白鴿黨立法會議員「單雞」單仲偕，佢話尋日朝早一見到有關改圖貼文就發覺好大問題，即刻叫負責嘅黨友將改圖貼文刪除。不過，直到尋晚，白鴿黨仍未刪除有關貼文。
