政壇：六隻眼睇到馮檢基撞車

話說前日立法會停車場就發生一宗小意外，有人目擊民協立法會議員KK馮檢基嘅座駕喺倒車泊位期間，「撞花」咗議員Starry李慧琼嘅座駕，事後不顧而去。雖然事後阿基賠咗四千元畀Starry了事，但佢強調無撞花Starry架車，而據聞同場有三位議員嘅司機直擊成件事發生，究竟邊個版本先係真呢？

李慧琼尋日喺社交網站上載其座駕疑被馮檢基撞花嘅「傷勢」。（李慧琼圖片）

不過，Starry黨友Ann蔣麗芸就爆料，話佢司機當時都目擊KK架車撞花Starry座駕，同場仲有譚耀宗嘅司機同田北辰嘅司機，阿Ann話一共有三個人、六隻眼睇到，無理由一齊睇錯啩？雖然係咁，但人多又唔一定係啱晒嘅，睇怕除非有閉路電視錄影片段，否則呢件事都好難搵到真相。

至於事件主角之一嘅Starry亦話，既然同KK達成和解協議，就唔再追究嘞。不過，講到KK手車係咪麻麻時，Starry就透露自己手車都唔好得去邊，因為佢○八年考取自動波車牌兩次先成功，之後到依家都未正式開過車，多年來都只係做乘客喎。