政壇：郭炳聯愛將突離數碼通
數碼通「開山功臣」Douglas黎大鈞突然話「係時候交棒畀下一代領導層」，就請辭執行董事兼總裁。數一數，佢前前後後加埋都服務咗公司十八年，佢仲係郭炳聯嘅IT愛將，受盡信任同倚重，突然話做多四個月就走，聽落都有啲啲錯愕。Douglas出名做嘢好有交帶，有傳佢將會返加拿大處理私人事。
黎大鈞辭職，但仲未知邊個會接棒。（資料圖片）
其實又咁講，Douglas都年屆六十，都屆退休年齡，今年八月底將係Douglas嘅Last Day，郭炳聯亦話對Douglas為公司所作嘅寶貴貢獻深表謝意。
但問題嚟嘞，數碼通只係話Douglas八月底交棒，但冇講明邊個接棒喎！職場上，搵人補位唔難，但霎時間要搵位同Douglas有番咁上下嘅，都幾考功夫。事關Douglas係會計師出身，做過投行，熟晒CEO同CFO嘅兩大強項，即係既睇得業務，仲睇埋數，佢亦係港大電子及電機工程學系諮詢委員會會員，呢啲跨界別專才家陣唔易搵。唔知郭生頭痕緊定已心中有數呢？
聽聞由內部調升嘅機會唔多大，咁即係挖角請專才？其實喺一三年時，同樣屬於新地旗下嘅新意網，亦由科聯系統挖咗任景信過去做CEO；即係話郭生睇住外面啲IT專才嚟挖角，早有前科。不過，既然未揭盅，不妨玩吓估領袖，唔知會唔會問吓前代「拔爺」伍清華？又或者郭氏第三代呢可？
