政壇：孫少文公展藝術品眾樂樂
藝術可以陶冶性情，饒宗頤學術館之友創會會長孫少文就喺○三年經濟低迷時愛上收藏藝術品，對抗當時生活上帶來嘅負面情緒，其收藏後來愈嚟愈多，獨樂樂不如眾樂樂，佢創辦嘅孫少文基金會將於五月中開設非牟利機構「一新美術館」，頭炮展覽將分享佢個人珍藏國學大師饒宗頤、齊白石同吳冠中等畫作，其後每隔兩至三個月定期轉換專題展覽，希望加深本土藝術氣氛。
孫燕華（左）同楊春棠拍住上籌備一新美術館開幕。
孫少文女兒兼基金會主席Chloe孫燕華話，喺好奇心驅使下於近五、六年開始跟爸爸四出睇展覽同物色心儀作品，但由於香港人習慣鍾意做乜都校到時間好準及趕急，有次佢去法國一間博物館，諗住距離閂門仲有十分鐘時間，可以趕去睇一陣，點知就食咗閉門羹。為咗令市民有更多機會接觸珍貴藝術作品，美術館總監楊春棠就話，該館會盡量開放畀市民參觀，只須簡單預約就可免費入場。
Chloe仲透露，嚟緊美術館首次展出嘅四十多件展品中，佢最欣賞嘅係已故本地名水墨畫家呂壽琨的《雨後維港》、該畫闊三米多、高近一米，內容描繪五十年代嘅香港，極具觀賞價值。
