政壇：園境納建築界新名最長
尋日政制及內地事務局向立法會提交條例草案，建議就一六年立法會選舉嘅本地立法，提出多項技術性修訂，包括建議將簡稱「建築界」功能界別議席的全名「建築、測量及都市規劃界」，由下屆起易名為「建築、測量、都市規劃及園境界」，以便更加準確地反映該界別嘅選民基礎同代表性喎。
建築、測量及都市規劃界議席改名後，全名總長十二個字，打破現時由馬逢國任議員、同樣包含四個業界的「體育、演藝、文化及出版界」功能界別的十個字紀錄，真係水蛇春咁長。現任建築、測量及都市規劃界議員Tony謝偉銓話，支持改名以回應業界訴求，承認全名十二個字「都有啲長」，但讀多幾次就順口。
Tony又透露，園境界爭取加名好幾年，上屆議員劉秀成已討論呢個問題，如今輪到佢，無理由得個講字。睇番園境界呢行，現時全港約有二百名從業員，行業相當冷門，但前景好吃香。佢話潮流興綠化園境，好多發展商都想搵呢類專才，但人才難求，分分鐘要搵到去內地先有。近年香港院校加快培訓園境師，爭人情況先有紓緩。既然咁搶手，喺議會內攞番個名分，都好合理。
謝偉銓想縮無頭緒
不過，界別名太長，真係好難記。Tony話有諗過度個「縮寫」，可惜諗完一輪都係無頭緒。佢又爆料話，經常有人誤會佢個界別係代表地盤工人，事關一般人一聽「建築」兩個字，就聯想到地盤，往往要費一番唇舌解釋，話佢係代表建築師、測量師同都市規劃師先至真。咁講法，難道佢想再伸長隻手，進一步延長呢個界別嘅全名，改為長達十六個字嘅「建築師、測量師、都市規劃師及園境師界」？
