測廢氣雙重標準 搞環保添煩添亂
港府搞環保有姿勢冇實際，早就唔係新聞，尤其係改善空氣質素方面，花招多多，甩漏亦多多。呢，本報上月率先踢爆，環保署同運輸署對車輛廢氣排放有兩套唔同檢測標準，搞到車主無所適從，申訴專員忍唔住介入調查，你話港產官僚係咪唔衰攞嚟衰吖？
係咁嘅，環保署去年九月實施汽油及石油氣車輛廢氣排放新管制措施，將氮氧化物排放列入管制，喺全港唔同地點放置遙測儀器，如果偵測到車輛廢氣超標，車主就必須於限期內將車輛送到指定嘅測試中心，接受俗稱「跑步機」嘅底盤式功率機廢氣測試。
本來呢，為咗改善空氣質素，環保署咁做無可厚非，弊在籌劃及協調不足，搞到問題多多，好事變壞事。即係咁，唔少車輛啱啱接受完運輸署年檢，全部合格過關，點知轉頭就被環保署捉到廢氣超標，車主唔谷氣就假。原來運輸署年檢唔包括氮氧化物排放測試，而運輸署指定嘅測試中心亦冇加設「跑步機」，唔少車輛就算過到運輸署一關，都過唔到環保署嗰關，有搵食車仲因此搞到「釘牌」添。
好明顯，兩個部門各自為政，玩殘車主。事件經本報報道後，申訴專員公署睇唔過眼，直斥兩個部門到家陣都未有就安裝「跑步機」訂出時間表，加上現時獲環保署認可嘅測試中心只有四個咁大把，係咪足以應付需求，令人懷疑，因此主動介入調查。
其實，被玩殘嘅點止車主咁簡單，汽車維修業一樣無所適從。呢，有車主「斷正」後，要求相熟車房維修車輛，以便通過環保署測試，點知車房耍手擰頭。原來業界根本唔清楚合格嘅指標係咩，環保署亦冇宣傳，搞到車房有生意都唔敢接，你話係咪大整蠱吖？
話時話，呢件事仲有另一筆糊塗帳。話說環保署喺呢個新措施推出前，曾推出資助的士及小巴更換催化器計劃，仲拍心口保證更換催化器後，車輛必可在廢氣檢測中過關。點知催化器無幾耐就失靈，耗油量增多之餘，廢氣排放比以前更多，問你服未。
所以話，港產官僚大事做唔成，小事做唔來，旨意佢哋搞環保喎，盞嘥氣嘅啫。講到改善空氣質素，當局年前煞有介事提出「清新空氣藍圖」，結果咪又係雷大雨小，銅鑼灣、旺角等路邊監測站連日來污染爆錶，證明當局改善空氣只係大隻講咋，叮！
