政壇：搞搞政：乳鴿柴文瀚反三跑民調倒自己米
機場興建第三條跑道（三跑）嘅消息引發民主黨（白鴿黨）老、嫩鴿內訌，繼乳鴿狂插老鴿立法會議員單仲偕公開支持興建三跑後，南區區議員柴文瀚更發起聯署反對。
逾半唔擔心威脅中華白海豚
近日佢又做埋三跑民調，弊在啲乳鴿尋日公布民調結果，結果卻同乳鴿反對興建三跑嘅立場打對台，倒自己米之外，最搞笑係連柴文瀚都話係咪企硬反對都要再睇長遠啲先喎！
本月初佢哋訪問咗八百多名市民，四成九受訪者認為香港機場嘅航運量需要加大，五成六受訪者話唔擔心三跑會污染水質及對中華白海豚棲息地造成威脅，六成三人甚至唔同意由立法會把關決定係咪興建三跑。民調結果係老鴿嘅立場更貼民意喎。
至於係咪支持用一千四百億元興建三跑，反對同支持嘅分別有五成二同四成二人。睇到咁嘅民意，柴文瀚都收晒口，冇再怒插單仲偕，只係話見唔到民意好支持興建三跑，而白鴿黨副主席羅健熙就繼續死撐，話民意唔係好支持興建三跑，仲有好多問題未解決。其實民調嘅結果已經好清晰喇，班乳鴿借唔到中華白海豚過橋，又唔願認衰，惟有賴三賴四啫。
