政壇：蔣麗芸鬧爆 泛民嘥公帑
自從泛民主派喺立法會發起不合作運動後，雖然成功突擊，取得立法會工務小組委員會同人事編制小組委員會嘅控制權，但議會內嘅烽煙亦未停過。，人事編制小組昨舉行特別會議處理逾期加入小組嘅申請，有份申請嘅蔣麗芸（Ann）都有出現，但佢表明唔係到場拉票，而係鬧爆泛民一錯再錯、低效率、浪費公帑兼對唔住納稅人。阿Ann憤然開鬧，差在未叉腰以示不滿，最後佢乾脆撤銷申請，拒絕再玩。
每次兩個小組委員會處理建制派議員逾期加入申請時，泛民都對申請人諸多留難兼玩批鬥，近期建制派議員都不甘受辱，冇再出席有關特別會議。阿Ann尋日就出席會議，開頭仲以為佢咁勇敢去拉票，點知原來係要鬧爆泛民。佢話，過往建制派都係一半人加入工務小組、一半人加入人事編制小組，估唔到泛民今次背信棄義，佢先申請逾期加入。佢又批評，建制派去年十月已申請加入小組，點知至今都未審理完，直斥泛民玩嘢係「一錯再錯」。
阿Ann仲意猶未盡，話去年度同期嘅人事編制小組已開咗九次會，處理咗二十二個決議，本年度開十三次會先批咗七個，直言對小組主席梁繼昌領導感到失望，所以要撤回逾期加入申請。
阿人反斥發言仲浪費
工黨李卓人就死撐，話如果通過議案愈多就愈有效率嘅話，最有效率就係廢咗兩個委員會，咩都唔使經委員會審議就最有效率喇。佢又批評阿Ann嘅小組發言原來只係為咗撤銷申請，佢先至係浪費時間同公帑喎。兩個小組處理咗啲逾期申請近半年都未完成，依家仲反鬧申請者嘥公帑，真係乜都佢哋講晒。
