香港處處有古蹟 奈何官僚唔珍惜

其實，香港地方雖然唔大，但一樣有豐富嘅旅遊資源，問題係當局識唔識好好利用啫。呢，有考古團體公布最近喺蒲台島水底嘅新發現，包括一尊古炮、兩個海軍錨同一堆鐵鏈，估計同屬日佔時期一艘大型帆船嘅殘骸。

講開又講，本港考古界最近都幾熱鬧。繼港鐵沙中線發現宋元古井，證明香港嘅歷史可以追溯到千年前，最近又有學者成功鑑定出一塊一億四千多萬年前嘅副狼鰭魚化石，首次證明「恐龍時代」香港已經有脊椎動物居住，對古生物學發展有重要象徵意義。

係人都知，古物古蹟除咗有學術及歷史研究價值，只要好好包裝同宣傳，更加可以發展成為旅遊景點o架。好似台灣嘅國立博物館咁吖，建於日治時代，經過活化之後成為旅客必到之地；又好似前身係小學舊址嘅台北當代博物館，依家轉型為美術館，一樣好有特色，吸引唔少旅客。

反觀香港就羞家咯，人哋有博物館，我哋亦有博物館，人哋搞得有聲有色，我哋就搞到門可羅雀。鬼咩，博物館散修修，東一間西一間，淨係同海有關嘅就有海事博物館、海防博物館及滅火輪展覽館等，五花八門，名目繁多，莫講話旅客一頭霧水，即使本地人都唔知邊間打邊間。加上當局得過且過，宣傳推廣不足，有乜法子唔拍烏蠅吖。係人都知，一間博物館使費唔少o架，上至館長，下至導賞員、保安員，閒閒地幾十人，耗費大量公帑之餘又吸唔到客，你話係咪攞嚟搞吖。

無計喇，港產官僚吹水唔抹嘴，開口埋口唔係保育就係活化，其實只係大隻講。幾年前有人提出將九龍城區內多個歷史景點串連成文物徑，帶動文化旅遊產業，點知市民急政府唔急，話就話正研究緊，實際上古諮會從來冇討論過相關建議，簡直吹脹！

始終都係嗰句，官僚靠得住，豬乸會上樹，旨意佢哋保護古蹟，推廣旅遊喎，蚊都瞓蛇都死。計太一叮話齋，古蹟固然要活化，官僚閉塞嘅大腦更應該活化，否則，遲早統統變成殭屍嘅咋，叮！