政壇：搞搞政：肥佬張沽貨料賺300萬
復活節長假後，股市接連兩日升逾千點，有人入貨，亦有人趁高位沽貨離場。立法會金融服務界議員張華峰（肥佬張）及保險界議員陳健波一向係立會股神，一直睇好港交所嘅肥佬張直認尋日高位沽貨，估計賺咗三百萬。至於陳健波就謙稱喺港股「放煙花」前，已經走晒啲貨，只係賺咗少少茶錢喎！
（設計圖片及對白）
陳健波等回落再入市
肥佬張去年尾曾掃入唔少港交所，我哋打電話問佢戰績如何，正帶隊北上深圳訪問嘅肥佬張話，一早睇好滬港通，而滬港通最大受惠係港交所，所以去年中開始大舉掃入港交所，平均價大約係一百四十幾蚊。肥佬張話，預計港交所仲有得上，但尋日朝早喺二百四十幾蚊時，都「係咁意」放咗近三萬股，呢單刁，佢至少賺咗三百萬，認真和味。
市場傳聞，肥佬張喺高峰期揸幾百萬股港交所，雖然近年不斷減持，但聽聞仍然手持最少五十萬股港交所，按照市價計，帳面過億元。不過，佢就笑騎騎唔肯答呢個傳聞是否真！至於陳健波就話，佢喺港股「放煙花」前已經走晒所有貨，最後一批內房股都喺日前沽清，慨嘆未能食正最近牛市嘅甜頭，只夠贏少少，飲餐茶喎！佢仲話，自己炒股幾十年，見過晒風浪，依家個市乜股都升，實在唔敢高追。佢預計大市好快有調整，寧願等個市回落，待下一波升浪先再重錘入貨喎！
