至叻星：爭講旅客量抽水 范國威攞彩觸礁

啱啱過去嘅長假期，城中焦點係訪港旅客人數大降，尤其係內地客銳減，尋日卻有報道話整體遊客升咗，搞到政府都要澄清，強調外來旅客其實下跌咗一成二，內地客更跌咗近一成半。好笑嘅係，在此之前，立法會議員兼香港本土成員范國威搶住抽水，喺個人fb貼上有關報道，事關文中引述佢批評特首梁振英講大話，以虛假數字抹黑反水貨客行動，呢頭貼，嗰頭就見政府澄清報道事實不符，攞彩都踩正蕉皮，跣到攤攤腰嘅范國威，出醜兼且瘀爆！

兜巴星：老點港台接亞視 Greg So屎橋捱轟

亞洲電視不獲續牌後，各界都睇住已經冇糧出、股東又唔肯再出錢嘅電視台，究竟會廣播到幾時？商務及經濟發展局局長蘇錦樑早前有好橋，話會搵香港電台接手，一旦亞視停止廣播，港台便會作出應變。政府搵港台做拆局先鋒，點知港台上下卻唔多畀面，港台工會更直斥政府嘅決定不負責任，有人又話以港台現時嘅人力物力，應付免費電視台嘅工作，難……難……難喎！港台嘅反應好似一掌摑落Greg So塊面咁，蘇局長扮大佬玩一錘定音，家吓出事啦！

第一手消息請下載on.cc東網iPhone/iPad/Android/Windows Phone Apps