本港股市連續兩日成交創歷史新高，城市大學尋日請出身投資銀行嘅前財政司司長梁錦松（阿松）出席午餐會演講，但阿松冇講股市，話題大都圍繞政治。阿松一開波就提到香港政改前途未明，話大部分香港人贊成普選特首，期望政改表決時，可以獲得三分二嘅立法會議員支持通過。

梁錦松唔講股市，講國民認同。

咁佢對近日嘅反水貨客行動又點睇呢？佢形容呢啲行動係唔文明，市民唔會認同，又話香港人出國時，都唔希望被其他國家嘅人用同樣行為對待。

至於港獨行為，阿松更立場鮮明，強烈反對，認為港獨違反歷史同現實，期望中港之間嘅矛盾同鴻溝，終有一日會消失。佢又寄語年輕人要認同國家及自己身份。被問到支唔支持就反港獨立法，阿松只係話：「好忙，今日唔講喇！」

第一手消息請下載on.cc東網iPhone/iPad/Android/Windows Phone Apps