政壇：學民仔爆料嚇窒白鴿黨
政圈傳聞經常有，日前卻有一單白鴿黨老鴿張文光畀學民思潮發言人黎汶洛玩殘嘅事，事件搞到白鴿黨急急發聲明澄清，而黎汶洛冇耐亦致歉，並收回言論，堂堂泛民大黨頓成驚弓之鴿，白鴿失威之餘，亦暴露佢哋幾咁驚瓜田李下。不過，道歉之後嘅黎汶洛又贈一句「空穴來風必有因」，陰謀論睇怕好難離白鴿黨而去囉。
（設計圖片及對白）
日前，黎汶洛爆料，話白鴿黨前教育界立法會議員張文光將「佔領中環」發起人戴耀廷嘅五分四方案呈交中央，若中央讓步就可促成泛民轉軚。嘩，又轉軚？
政改工程啟動以來，白鴿黨一直揚言會否決喺人大「八三一」決定下嘅政改方案，仲再三企硬，呢個取態同佢哋喺二○一○年臨時轉軚支持政改後，備受批評、選舉受狙擊有關。所以上述事件篤正該黨死穴，即刻漏夜發聲明，澄清絕無此事。
黎汶洛：「空穴來風必有因」
所謂戴耀廷嘅五分四方案，即係戴早前提出，特首參選人須獲五分之四提名委員會委員支持，咁就合資格出閘。黎汶洛講到張文光遞方案、白鴿黨醞釀轉軚，有名有姓，有因有果，真嘅一樣。加上白鴿黨早前先有黨內溫和派狄志遠同黃成智先後發表支持政改袋住先嘅言論，呢個時候有呢啲傳聞實在好敏感，所以早前迅速打壓溫和派嘅白鴿黨又登場，澄清有關消息屬誤導資訊，係子虛烏有。
黎汶洛喺佢哋澄清之後，都宣布收回言論，並對引起各界疑慮表示歉意。不過黎都忍唔住加句，有關消息喺社運及政黨圈子流傳超過半個月，仲話「空穴來風必有因」，希望市民繼續監察政黨同立法會議員嘅政治舉動咁話。呢番說話真係有骨、有刺，但張文光都焗住「大量」，尋日透過白鴿黨社交網站平台，表示歡迎年輕人勇於改正，又話如果將來有機會，都希望同黎汶洛多啲溝通喎。
