日棄膠樽二百噸 環保淪為大隻講

嗱，有調查發現，香港每日平均棄置二百零六公噸膠樽，等於六百八十七萬個，幾乎一人一個，都咪話唔得人驚。雖然五成三受訪者有將膠樽放入回收箱，但多達九成二人缺乏正確嘅膠樽回收知識，其中四成二人唔知道如何分類，近一成人甚至認為唔使分類添。所以話，香港唔止人均垃圾量冠絕全球，環保水平亦隨時係全球包尾。

正如調查機構話齋，將膠樽放入回收箱仲未夠o架，正確做法係將膠樽、樽蓋及招紙分開投入回收箱。好明顯，調查結果除咗反映港人回收知識貧乏，更證明當局欠缺宣傳教育，唔怪得垃圾分類推行多年都一事無成喇。

其實，莫講話一般垃圾桶經常放滿膠樽，就算專用回收箱，一樣長期塞滿各式垃圾。最離譜嘅係，承辦商往往冇及時清理回收箱，任由垃圾滿瀉，就算市民有心將垃圾分類都無從入手。仲有呀，有環保團體統計發現，全港垃圾桶多達四萬二千個，但回收箱嘅數量極少，個別地區每三十七個垃圾桶至有一套回收箱，完全不成比例。當局敷衍了事，到底有冇誠意推行垃圾回收，唔使問都知喇。

話時話，源頭減廢大大話話講咗十幾年，可惜港府對回收業幾乎全無支援，任由業界自生自滅。咁都算嘞，最弊係對回收商冇監冇管，早前有回收商被踢爆將回收所得嘅垃圾直接送去堆填區，問你服未。難怪源頭減廢推動多年，廢物數量不跌反升，一三年棄置堆填區嘅固體廢物量，比一二年仲多咗百分之三點四。

講到尾，港產官僚搞環保冇嘢叻，最叻就係講錢，獨沽一味徵費。膠袋徵費、垃圾徵費、玻璃樽徵費、電器徵費，名目繁多，樣樣都要市民埋單，幾時見過港府有承擔吖？當局得過且過，求求其其，環保又點可能唔事倍功半喎？

點講都好啦，推動環保，人人有責。港府固然唔可以得把口，除咗要落實政策，做好配套，亦要加強宣傳教育，而市民亦要自動自覺，時刻保持環保意識，千祈唔好得三分鐘熱度，否則，無論擴建幾多堆填區、興建幾多焚化爐，都係嘥氣嘅咋，叮！