起動九龍東辦事處活化觀塘後巷，冀疏導人潮，不過卻自暴其醜，後巷依舊堆放垃圾和停泊車輛，李衞於是去問吓發展局局長波波搞邊科。

李衞：後巷美化就美化咗喇，不過衞生冇改善過，點叫人嚟行呀？

波波：咁始終都係後巷，衞生係差少少。

李衞：只係整門面工夫，點搞都冇用啦！

波波：係試驗階段嚟啫，畀啲時間就會有成效啦。

李衞：仲諗住會成功？啲人寧願行番行人路，都唔會走入去！

波波：但有嘢睇又有特色……實有人識得欣賞嘅！

李衞：有，有人欣賞嘅……你睇吓嗰邊！

波波：嗱，都話o架啦……

李衞：咪就係得蛇王嚟煲煙嘅人，佢哋當後巷係寶o架！

波波：**@#%^&@!!!

第一手消息請下載on.cc東網iPhone/iPad/Android/Windows Phone Apps