城中鏡：內房CFO掀執位潮
魚唔過塘唔肥，新年過後唔少打工仔都趁出埋花紅就轉工。近排發現唔少內地房產公司嘅CFO（財務總監）都大執位：時代地產之前嘅CFO陳偉健就過檔去咗新城發展做執行董事，禹洲地產前CFO邱于賡就轉跳咗去泰凌醫藥，龍湖位韋華寧同朗詩綠色地產嘅劉達就選擇向外闖，各有各精彩。
邱于賡（圖）轉到泰凌醫藥做首席財務官，而韋華寧就冇講去向。
韋華寧
上市公司管理層「玩音樂椅」走嚟走去，唔算新鮮事，但要數比較特殊嘅Case，可以話係禹洲，話說禹洲上個月底剛話將原本做緊CFO嘅邱于賡升做副總裁，點知事隔咗一日，就見泰凌醫藥宣布委任邱于賡做首席財務官。即係點？即刻打電話畀邱于賡問個究竟。原來佢已經靜悄悄離開咗禹洲。禹洲咪好失落？不過佢原來都推薦咗佢個Friend，即之前喺華南城負責企業融資嘅許進業頂替佢個位。
至於龍湖前CFO韋華寧亦對公司有情有義，雖然上個月公司出業績當日佢已經離職，記者會亦由新CFO趙軼負責答問題。之不過，念在舊東家之情，韋華寧都好有心喺台下做聽眾撐場，但佢就無透露之後去向。至於朗詩綠色地產前CFO劉達，聽聞佢計劃自己創業。
