Cally鄺美雲尋日出席一個珠寶品牌活動時，好高興咁話：「見到沈生（沈運龍）創造咗支咁靚嘅鑽石結他，好Proud of香港人可以入到健力士世界紀錄大全，好值得鼓舞，對香港藝術文化產業嚟講係一樣好大嘅貢獻。」呢支鑽石結他由雷頌德設計及由工藝大師胡錦超監製。

鄺美雲對呢支鑽石結他嘆為觀止。

怕跌唔敢設計鑽石手袋

一向擅於珠寶設計嘅佢話暫時未有任何設計靈感嚟打破世界紀錄，依家都係設計啲畀大家平時可以用同佩戴嘅嘢，好似首飾、鑽石筆、香水樽同打火機等等。咁有乜嘢係想設計而未實行？佢話：「好多嘢都想做，有諗過設計鑽石手袋，但驚會唔見或者跌咗，所以都係設計飾物同家用用品好啲，我對屋企用嘅嘢都好有興趣，我想整個鑽石相架，擺一張自己好獨特嘅相，係一張自己好靚嘅相，但仲未有。」

佢隨後又大爆近來有人盜用自己嘅照片嚟開facebook帳戶，佢話：「我本身有用開facebook，但呢排竟然有人偷用我張相開帳戶，仲有好多唔識嘅人嚟我個帳戶度，最後我取消咗個帳號，唔係驚有人用嚟做不法行為，係覺得好奇怪有啲唔識嘅人留言話好鍾意你。」

第一手消息請下載on.cc東網iPhone/iPad/Android/Windows Phone Apps