城中鏡：巾幗論政名媛力撐
歐美等地女性參政盛行，早前施政報告都提到，今年會委任更多女性加入諮詢及法定組織。發揮空間大咗，城中一班事業女性深表支持。合和實業主席「哥頓」胡應湘太太胡郭秀萍話，時下女性獨當一面，專長廣泛，莫講話參政，就算喺地盤工作，一樣有用武之地。
婦協副主席高靜芝（左起）、副主席廖湯慧靄、理事胡郭秀萍及監察顧問雷羅慧洪，都係獨當一面嘅時代女性。
有兩個仔嘅港島婦女聯會主席張雅麗（左）同副主席林玉茵都係事業女性，閒時參與公職。
林李婉冰（右）同中電企業發展總裁莊偉茵，齊聲支持女性多議政。
哥頓太：可互補不足
香港各界婦女慶祝三八國際婦女節，早前喺中環舉行遲來的酒會，話題離不開講吓「女高管問題」。環顧全球及亞太區高級行政人員行列中，男人仍然多過女人三倍。睇番香港，「女高管」比例唔算失禮，但相比女高管最多嘅俄羅斯，仲有段距離。哥頓太就贊成畀多啲機會女性議政，認為佢哋天生心思細密，可以補男士嘅不足。
擔任唔少公職嘅東華三院前總理林李婉冰都話女性議政係好事：「開會有女人喺度，會中和氣氛，女人睇事件，亦較顧全大局。」「美容教主」鄭明明一早活躍於內地政商界，佢話女性社群影響力愈來愈大，呢股力量絕對不能忽視，故廣納更多女政客，係明智嘅做法。
一句講晒，開會多幾把女人聲，唔係只得一個墟嘅。仁濟醫院董事局主席蘇陳偉香認為，女性喺制訂教育、青年人及長者政策時，會有細膩嘅諗法，決策結果更易為大眾接受。港島婦女聯會副主席林玉茵鼓勵青年女性多參與社會團體及公職，放眼世界。不過，佢坦言公職多咗就要犧牲唔少購物時間，相信要等到出差先可以偷閒行街喎。
