政壇：民陣烏龍電郵洩機密
稍為有經驗嘅社運人士都知道電郵要做足保安措施，否則好容易被不法分子入侵，所以一啲較為敏感或機密嘅議題，佢哋都棄用電郵溝通，寧願兜口兜面講清楚，以免機密外洩。不過，民陣一班成員可能警惕性特別高，反而因為咁而擺咗一個大烏龍。話說有民陣成員喺電郵收到例會議程，以為又係啲帶有病毒嘅電郵，自動轉發畀其他人士，搞到民陣開會議程大公開。
民陣召集人陳倩瑩尋晚喺社交網站自爆，話今晚民陣開例會，上星期開始已經將開會議程電郵畀民陣中人，但點知有人以為係播毒電郵，又有民陣中人電郵戶口一早被黑客入侵咗，結果兩類人士都自動將該電郵周街轉發畀其他人。由於係無目標咁轉發，收到電郵嘅人覺得更加可疑，結果傳吓傳吓，好多人就以為真係毒電郵。
所以陳倩瑩先要急急澄清，話如果大家收到封電郵唔使緊張，因為電郵入面所有文件都係無毒。不過錯有錯着，可能唔少人都擔心內裏有毒，唔敢撳入去睇，所以應該無乜人知道佢哋開會議程嘅。
