政壇：象哥幫邊境購物城招「商」

廠商會會長Eddy李秀恒尋日出席活動時話，象哥早前與廠商會開會介紹過邊境購物城概況，希望廠商會旗下嘅品牌局以及舉辦工展會嘅展覽服務公司，可以組織香港名牌及廠商齊齊共襄盛舉。

Eddy話購物城除咗可以畀水貨客入貨之外，亦可趁機推廣香港品牌，所以待租金、經營模式等詳情進一步清晰後，即可向參展商廣泛諮詢同招商。

同場嘅廠商會展覽服務公司主席兼廠商會副會長Tony戴澤良就話，部分工展會參展商初步反應唔錯，佢同象哥正緊密溝通細節。按照規劃，邊境購物城共有約三百八十幾個攤位，Tony話如果一切順利，希望可以租用五十至一百個攤位。佢仲話，唔擔心邊境購物城會搶咗工展會客源，事關內地客只佔工展會入場人數不足三成。