政壇：張炳推三跑拖低民望
興建機場第三條跑道係最近社會嘅熱門話題之一，有人批評機管局花一千四百億元，但又繞過立法會審批同監察，亦有人話環保問題未解決，總之爭議不斷。香港研究協會本月一日至六日，以電話訪問咗一千一百名市民，當中運輸及房屋局局長張炳良評分喺眾多司局長中跌幅最大，加上市民對政府紓緩房屋問題評分亦創新低，花名叫「張炳」嘅張炳良，真係要諗諗計，咪畀市民炳咁多啦，止一止民望跌勢好喎。
（設計圖片及對白）
跌幅冠絕司局長
受訪者對特區政府五項政策表現，對比兩個月前調查全線下跌，五分為滿分，評分最低係「紓緩房屋問題」，只得二點一一分，比上次大跌零點二三分，分數跌至調查以來新低。協會相信同樓價屢創新高，市民居住需求進一步受壓有關。至於司局長滿意度，幾乎全線下跌，當中以張炳良跌幅最大，跌咗零點一九分，協會相信同佢未能有效釋除公眾對機場三跑工程疑慮有關。
行政會議早前通過興建機場第三條跑道後，爭議不斷。張炳良尋日下晝去咗中華總商會講座演講時話，根據機管局○八年委託顧問所進行的評估，現時兩條跑道不論以任何方式運作，每小時處理六十八班航班升降已到極限，雙跑道系統已接近飽和。如不發展第三跑道，損失嘅潛在經濟淨現值達四千五百五十億元。
另外，佢又回應社會對興建第三跑道嘅各種質疑，強調三跑嘅融資方案無意繞過立法會，三跑計劃有很多方面均需向立法會交代和接受社會監察，亦唔排除發行債券，讓小市民購買。
佢又話明白社會對向用者收費有唔同意見，機管局會積極考慮調低收費水平，向長、短途旅客作不同收費。三跑項目不僅能保持本港作為國際航空樞紐的戰略價值，亦對內地有好處，中央部委對三跑項目持肯定態度。
