公園臨時四十年 規劃烏龍亂象多

唔講唔知，全港目前有三十五個大大小小嘅臨時康樂場地，好似觀塘區茶果嶺臨時休憩處咁，服務居民二十九年，歷史認真悠久；位於中西區嘅堅彌地城臨時遊樂場仲誇張，一九七六年已經啟用，到依家仲係「臨時」。有年輕街坊講笑咁話，一出世個公園已經喺度，問你服未。

喂，四十年流流長，莫講話起公園，連送太空人上火星都仲得，點解拖咁耐？之唔係港產官僚議而不決，決而不行，遲遲未規劃好土地用途囉。好似當局九四年已着手研究堅彌地城臨時遊樂場嘅實質用途，包括研究興建抽水泵，但由於規劃大綱至今未完成，遊樂場咪繼續「臨時」落去囉。

即係咁，呢類臨時公園妾身未明，當局又唔肯落本保養維修，設施簡陋、爛蓉蓉唔使講，有啲淪為私家晾衫場，有啲更被鐵欄重重圍住，當地人都唔知嗰度有個公園。難為負責管理嘅康文署仲死撐，話臨時康樂設施雖然一般面積較細，但同其他場地一樣，可供市民作康樂休憩用途，喺管理上無大分別喎。

嗱，呢啲咪解釋等於掩飾囉。有建築師就講得啱嘞，用普通常識判斷都知，「臨時」最多講緊三、四年，既然超過廿年都冇其他發展，就唔應該以臨時規格設計場地設施。所以話，「臨時」絕對唔係卸膊嘅藉口，特別係家陣人口老化，市民生活空間狹窄，綠化同康樂土地需求殷切，建設用地更加短缺，當局由得臨時公園長期丟空，簡直係暴殄天物。

話時話，港府官僚胡混度日，規劃一向烏龍百出，亂象叢生，康文署公園嘅甩漏只係冰山一角咋，大量官地以象徵式租金批出畀達官貴人做私人會所，先至係最大嘅浪費。港府身為大地主，一邊浪費珍貴土地資源，一邊四出搵地建樓，甚至連郊野公園都唔放過，以致被譏為「盲搶地」，簡直神經錯亂。

咁講啦，公園要臨時到幾時就唔知，太一叮淨係知康文署官老爺薪高糧準，絕對唔係臨時工。唔該拿拿臨做嘢，一係執靚個場，等街坊多個休憩去處，改劃用途都得，一係自己執包袱，幫納稅人慳番筆啦，叮！