城中鏡：下拍拍：結佛緣棄執着 鄧鳳賢助建浮屠
依家都市人壓力大到透不過氣，真正快樂，到底去邊度搵？恒基地產營業部副總經理Anita鄧鳳賢，雖然事業有成，卻未令佢感到真正快樂。本身係基督徒嘅Anita，十年前巧遇「星雲大師」講道，頓覺人生開悟，從此對佛學產生濃厚興趣。三年前有緣遇上尼泊爾一位寧波車（對藏傳佛教上師的尊稱），非常投契，不時到當地禪修，佢話：「學佛令我明白妒忌、憎恨、執着，係痛苦嘅根源，捉住呢啲嘢唔放，事業再成功，內心都無真正自由。」
鄧鳳賢話學佛後，人生快樂指數爆晒燈。（受訪者提供）
Anita學佛後領悟「無常」、「放下」，腦袋即時「叮」一聲開竅，笑言性格一百八十度改變，唔再妒忌靚女，亦唔會羨慕人家財富多過佢：「各有前因莫羨人，人家今生有大福報，係前世種下嘅善因。」所以佢努力結善緣，種善因，數月前協助寧波車喺佛陀嘅出生地尼泊爾藍毗尼興建巨型佛塔，拍心口擔任晚宴籌委會主席。工程造價高達二億美元，聽落係天文數字，但佢就有信心聚沙可以成塔，希望有日夢想成真。
