城中鏡：上影影：謀連任建仔中委 張國鈞自比蔣志光
政界中人喺政圈能否出人頭地，有時好講際遇，亦有時係時來運到。最近建仔舉行換屆中委選舉，建仔副主席Horace張國鈞爭取連任中委，喺候選人名單自我介紹一欄中，疑與實力派演員蔣志光相提並論，事前相信冇人會估到佢有呢個奇招。
張國鈞想好似蔣志光咁做實力派，唔知要捱幾耐呢？（資料圖片）
張國鈞（資料圖片）
今次建仔有近六十人參加換屆中委選舉，大部分自我介紹嘅內容都無甚驚喜，唯獨係Horace較為別出心裁，喺自我介紹中，形容政壇同娛樂圈一樣，都有各式各樣人物，佢自言會默默耕耘，做好每樣工作，盼望有朝一日好似蔣志光咁攞得專業大獎。
Horace接受查詢時，承認蔣志光最近人氣十足，因此趁機借題發揮，希望亦可以好似對方一樣做到實力派喎。話時話，蔣志光喺娛樂圈打滾多時，一直默默耕耘，最近終於有出頭天，廣受大眾歡迎注視，唔知Horace係咪都有同樣心理準備呢？
