城中鏡：琵琶公主有知音 孫穎覓得接班人
鋼琴大師劉詩昆同另一半有「鋼琴公主」、「琵琶公主」之稱嘅孫穎，上個月赴英出席倫敦交響樂團舉辦嘅盛大音樂慶典，當晚仲獲得英女王接見。返嚟冇耐，孫穎早前就出席咗香港南京總會嘅董事局就職典禮，以行動支持該會創會會長張心瑜。
孫穎（右三）出席香港南京總會董事局就職典禮，支持創會會長張心瑜（右二）。
張瑋傑太太Isabella攞住琵琶影相時，孫穎話：「佢有東方女性嬌滴滴樣子。」
劉詩昆（左二）同孫穎（左一）早前出席倫敦交響樂團舉辦嘅盛大音樂慶典，仲獲得英女王（右一）接見。（資料圖片）
孫穎當晚更用琵琶彈奏咗《送你一支玫瑰花》同《十面埋伏》呢兩首琵琶名曲。之後佢同一位攞住琵琶嘅美女影相，孫穎不禁笑住話：「我發掘咗一個琵琶公主接班人，佢係土生土長美女。」呢個接班人就係仁愛堂前總理張瑋傑嘅太太Isabella。
「為興趣更有前途」
Isabella育有三名子女，佢一直有幫香港南京總會做義工，孫穎話：「佢係香港女仔，國語講得好好，唱歌唱得唔錯，好有品味。」
孫穎更大讚Isabella懷孕時，身形保持得很好，「完全睇唔出佢佗住BB，只係肚皮嗰個地方有變化，其他嘅地方就冇變化。」
Isabella將會同小朋友一齊學習琵琶，講到呢度，孫穎亦都有感而發慨嘆話：「喺香港，學習琵琶嘅人愈嚟愈少，依家電子世界力量太大，愈嚟愈少人願意花時間去學一個高難度樂器。」
佢反而鼓勵大家應有一技之長，又話：「有一技之長係取之不盡嘅財富。接班人形象好緊要，佢（Isabella）大有可能做到，有時為興趣，反而更有前途。以楊振寧太太翁帆為例，彈鋼琴係佢嘅一個夢想，佢付出好多心機去練習，效果仲好過為考試或者為其他目的去學。」
