政壇：古洞復辦醫局求助何東後人
尋晚上水古洞村舉行一年一度觀音誕盆菜宴，筵開一百四十席，廣邀鄉紳父老出席，但芸芸賓客中，居然發現已故富商何東爵士長孫何鴻章同其兒何猷彪一齊現身，莫非佢哋同新界原居民另有淵源？負責邀請佢哋嘅古洞村村長曾家新笑言，古洞名副其實係何家「恩公」，何東早年亦慷慨出資，為村民興建「何東夫人醫局」，但醫局正值生死存亡之秋，村民惟有邀請何東後人出手協助復辦醫局。
曾家新（右）多謝何鴻章（左）現身幫忙。
空置多年嘅何東夫人醫局被列為二級歷史建築。（資料圖片）
何東匿村避侵華日軍
位於古洞街市旁嘅何東夫人醫局服務鄉民逾七十年，惟約十年前，因為醫局屋頂瓦片倒塌而停用至今，村民只好靠一周當值兩日嘅流動醫療車接受基本治療。但醫療車只有護士當值，村民動輒都要山長水遠去北區醫院接受治療，相當費時。曾家新話唔少村民對醫局好有感情，自言與兒子都係醫局接生，但過去同醫管局幾經交涉要求復辦，醫管局都「耍太極」冇下文，惟有嘗試邀請何鴻章出手。
雖然何鴻章年近九十，出入都要靠輪椅代步，但佢專誠入村參加盆菜宴，以英文致辭時，亦對政府停用醫局感到痛心，畢竟醫局係爺爺為村民而設。他承諾會為村民向政府商討重開醫局，仲拍心口保證無論牽涉錢銀、法律問題，都會為村民想辦法。
講起古洞係何家「恩公」段古，曾家新透露日軍早年侵華期間，已為香港貴族嘅何東曾經匿藏古洞村，獲村民庇護，何東為報答古洞村民，戰後捐錢興建醫局、小學同實驗農場，其中醫局命名為何東夫人醫局。同場嘅上水鄉事委員會主席侯志強亦笑言係「來自」何東夫人醫局，還稱政府早前宣布發展新界東北，單係古洞北發展區將來就有至少十五萬人遷入，復辦醫局有助分流北區醫院人潮。
