政壇：梁美芬與OL隔空罵戰
仲記得梁美芬○七年喺九龍城區議會黃埔東選區勝出，當選區議員，翌年被指得到「祝福」，當選成為立法會議員至今，所以黃埔東都算係佢嘅成名之地。有佔領行動團體「青年新政」早前就召開記者會，使出「女刺客」一招，派出OL美女游蕙禎化身社區主任，挑戰梁美芬。
設計圖片及對白
游蕙禎當日就話，當區居民好難約到梁美芬，梁美芬尋日就反駁話：「街坊需要我嗰時，就會見到我。」又暗諷對方「憑空講」好容易。
梁：「街坊需要時就見到我」
游蕙禎趁復活節頻頻落區，近日都有上載相片到社交網站，話自己喺黃埔花園對開街站，似乎來勢洶洶。梁美芬尋日回應話，歡迎任何人落區，但話鋒一轉，就講明希望年輕人做實事，唔好做「討厭嘢」，之後就舉例話有名年輕女子，早前趁政改三人組落區時，高呼激進口號，要佢勸走。雖然佢唔知呢位女子同青年新政有冇關係，但暗諷意味甚濃。
游蕙禎話，居民好難約到梁美芬，即係話佢落區不多。梁美芬就教游蕙禎，話要學習服務地區，就唔好自以為是，「憑空講」佢少落區好容易，舉例自己跟進港鐵延線，搞好多活動，「街坊需要我嗰時，就會見到我」，所以話佢少落區係假象，相反對方係喺「空中樓閣」，亦毋須要與對方會面做騷，仲叫游蕙禎唔好騷擾街坊喎。咁即係話游蕙禎曾經騷擾街坊？梁美芬就話有人咁樣反映喎。睇嚟兩女未短兵相接，隔空罵戰已經一觸即發。
