水貨集團搬倉 執法後知後覺
道高一尺，魔高一丈。水貨問題搞到香港雞毛鴨血，港府早排釜底抽薪，打擊違例經營嘅屯門工廈水貨倉，大家以為水貨活動有所收斂喇，點知水貨集團竟轉移陣地繼續搵食，你有張良計，佢有過牆梯，問你服未。
話說早前屯門有工廈單位違反地契條款經營水貨倉，被地政總署「釘契」兼收回單位，水貨集團即時變招，轉移到人流稀疏嘅元朗工廈，而且採取更嚴密嘅保安措施，一於同當局打游擊。本報記者明查暗訪，發現元朗洪水橋附近一個工業區部分單位懷疑被改裝成水貨倉，呢啲工廈位置偏僻，平時人影都唔多個，最近就經常有人拖住行李箱、孭住大背囊出入，部分單位仲裝咗多個鏡頭，擺明有蠱惑喇。
記者暗中觀察發現，呢啲工廈單位重門深鎖，連招牌都冇，單位內有大批貨物，唔少人做緊包裝，出入者以退休人士同師奶為主，亦有唔少講普通話嘅內地客。以前嘅水貨倉多數打開大門，來者不拒，但依家嘅疑似水貨倉就高度設防，生人勿近，除咗閉路電視，仲有雙重鐵門，除非係熟人或有人介紹，否則不得其門而入。有水貨客透露，帶貨走一轉深圳灣口岸，就可以賺一百八十元，如果一日走幾轉，收入都唔錯o架。
所以話，天下熙熙，皆為利來，只要水貨活動有利可圖，自然有人趨之若鶩。依家嘅問題係，水貨活動愈演愈烈，唔止滋擾港人生活，而且激化兩地矛盾，搞到永無寧日，究竟點樣解決呢？正如學者話齋，水貨客充斥社區，令居民感到不便，亦導致社區零售業變得單一化，令反水客活動出師有名，絕對唔係小事。
對於元朗有工廈單位懷疑被改成水貨倉，當局又有乜反應？地政總署話喎，屯門、元朗同北區分區地政處已經成立特別行動小組，針對性打擊呢類違契個案。嗱，講就係咁講喇，但耍官腔可唔可以解決問題，真係令人懷疑。
係人都知，只要旅客攜帶貨物冇超出海關規定，從事水貨活動就唔算犯法，呢方面當局可以做嘅唔多，最有效嘅辦法就係加強打擊違例經營水貨倉，至可以減少水貨活動。所以話，既然元朗有工廈懷疑被改裝成水貨倉，當局最少應該派人去了解吓，而唔係一味耍官腔，係咪？官僚後知後覺唔緊要，最怕冇知冇覺，咁就大件事喇，叮！
